تطرطيق لمسكة

كيفاش وعلاش مكنحملش نسمع تطرطيق لمسكة ؟ هو واحد السؤال فلسفي ٠٠٠معرفتش فين نلقى ليه جواب، واش نمشي عند طبيب نفسي باش نعرف منين جات هاذ لعدواة لي بيني وبين هاداك الصوت ديال تطرطيق لمسكة ٠٠.طق طق طق ٠٠٠ ؟ ولا يمكن نمشي لشي موسم باش نغسل وذيناتي ونشوف شي فقيه يسبب ليا ويعطيني شي حجاب به ما نبقاش نسمع تااااا طرطيق ٠٠٠ و يمكن الحل الزوين هو ندير ليا شي وقفة احتجاجية حدا لبرلمان باش تمنع بوها ديك لمسكة في بلادنا ٠٠ تبقى تدور ٠٠٠ ولا حصلت عند شي واحد ٠٠ يحديو ليه سنانه ويخليوه غير يلوج بلا صداع ٠٠٠ ما عندنا ماض نديرو بصداع ياك؟ كلشي نقبلوه إلا تطرطيق المغاربة للمسكة٠٠٠
من اللقطات لي جرات ليا مع المسكة، باقية نعقل واحد نهار كنت راكبة في الطاكسي من برشيد للدار البيضاء، ديك الساعة كانت حوالي الثامنة ديال الصباح، وكانت باركة حدايا سيدة ” كتطرطق المسكة ” بصوت عالي وبزربة، ومن الصدف “لي مازويناش” هي أن جن جنوني مكيحملش يسمع هاذ الصوت، ولأنني تبرزطت بزاااااف .. طبعا طلبت منها بأدب تحبس من طرطيق، وهي ترد عليا بوحد لبرودة “منقدرش لأنني كنهضم بالمسكة و..مريضة بالمعدة” ٠٠ ايوا استمر العذاب ٠٠٠ والسيدة كتطرطق وأنا مرارتي كتطرطق٠ وبناء على هذه الفقسة الكبيرة سوف أصدر قراراً في المريخ “ممنوع تطرطيق المسكة “وأي مخالفة يعاقب عليها “ببونية للفم باش الأسنان يطيحو وما نبقى نسمع والوو٠٠٠

نادية صمراني

أضف تعليقك

من شروط النشر : عدم الإساءة للكاتب أو للأشخاص أو للمقدسات أو مهاجمة الأديان أو الذات الإلهية، والابتعاد عن التحريض العنصري والشتائم.

تعليقات

0